MONA LISA; KHAWVELA LEMZIAK LAR BER - Familia Fanai Laltansanga
Mona Lisa hi kum zabi 16-naa lemziak thiam hmingthang Vinci khuaa mi, Leonardo,(Leonardo da Vinci) lemziak a ni a.Poplar thing phek, a dung inches 30, a vang inches 21-ah Oil hmanga a ziak a ni a. Tunah chuan France sorkar ta niin Paris khawpui Louvre Museum-ah an tar a ni.
He painting hi hmeichhe pakhat a kâwng chin chunglam lem a ni a, hahdam tak leh lungmuang taka a ţhu lai lem a ni a. A mitmeng leh a nui hmel mawlh mai hian mit a la satliah mai pawh ni lovin ngaihtuah zui tur tam tak a entu rilruah a hnutchhiah ta ţhin a, hei vang tak hian he lemziak anga zirchian hlawh,sawichhawn hlawh lemziak hi khawvelah a la awm ngai lo a ni, an ti hial a ni.
He nu lem hnung lama ram lem mawi tak leh kawng kawi fiah lo deuh riai han en hian mumang ramah min hruailut nghal emaw tih turin kan awm nghal pang a! A kut, a âwm bawr leh a hmel chu rawng inang a hman avang leh hmeichhe tituai-nona tilang chiang tura a lemziaktu-in rilru nei taka a hman a kawr hak uk leh a dum lam atang chuan a entu mit chu a ban atangin a âwmah; chuta ţang chuan a hmelah tak min hruai lut a. A mitmeng han en chet chet hian a ngainat-awm zual leh ta sauh va, a nui hmel han en chian phei hi chuan kan nel em em leh kan hmangaih em em te’n min nuih ta emaw tih mai turin a entu thinlai a tihlim vawng vawng thei thin a ni.
Art hi a lo mak thei khawp mai! Champhai khawdaia In râm a hmuh atangin hla phuah thiam Zirsangzela Hnamte(1952-2002) chuan a rilru mitthla leh a suangtuahna hmangin zeldinna nen chu In râm atang chuan hla thu ţha tak leh hla thu mawi tak a thluk pawh mawi tak, a hla thu nena inrem leh inchawih tak a phuah(create) thei a.
A khi chhak Zo bâwm romei zing riai,
Zokhawsang lentu chawi velah khian;
Ţhiah loh buk thlam iang a ding liai e,
Chhawlthing hnah nem te’in bawm chi chiai e;
He hla siamtu hian a rilru mitthlaa run ram chu thlam ram nen tehkhinin a han chhamchhuak ta phawt a. Chutah chu run râm chu belhlai run dang ang lo tak a naupang te thlawm reh dan tur , thei reh taka a reh vawng vawng mai tur chu suangtuahna mitin a han thlir a;
Zan khua a tlaiin leng zawngte chuan.
Runin tap tualah senmei an chhi,
Mahse chu run ram thim riai-ah chuan
Nau nawn aw rawl reng a thang ve lo!
Hmanah chuan hlimte’n laichhuat an mawi
Siali hel Vala chham ang zal e ;
Tual vawk rawl so ri baw-ar khuang nen
Chiar nghin nghian chu rum kha a chul zo ta,
Aw..Sawn ni awm thei lo run in khartung,
Senmei dawhtling pawh rial ang dai e.
He hla a thluk a la siam hma hauhva thuhlaril, a rhyme leh rythm nei tha tak mai hi a thu nena inrem takin a thluk, a Mizo aw phawi,ri fan, ri hniam uaithla leh ri sang fan raih lai inhmeh leh inrem em em maiin a rawm siam chhuak thiam leh ta zel a,”vawk rawl so ri “tih lai vel,Pawih ţawng “rawl” a hman lai leh “so ri” tih lai vela a thluk rawn lawn sang chho vel mawlh mai hian lung a tihlen mai piah lamah Ţhal va-ek- char chhun ni sensat laia ramhnuaia chho deuh mai han kal laia,thlanfimin taksa pum a buala min bual lai tak a,han hahchawlh det lai a, Zo thlifim,chhem damthli in min rawn chhem dai sawng sawng ang mai hian lairil a fan raih raih ta mai a, Mizo zupuiin chhawl hal lai tak hrawk a fah thla vawng vawng ang mai hian he hla ngaithla tute beng a fah veng veng mai a ni.
Chu run râm a reh nachhan chu eng vang nge ni ta ang le? tia a ngaithlatute ngaihtuahna-ah pawh lung zing tak leh thinlai hnim ruih chunga kan inzawh mek laiin hlasiamtu hian run thlak deuhmaiin Awmlai vang nge tuan tual vang tiin hlathu a rawn rem leh ta chiah a.
Engvang kher hian maw run ram I chan?
Awmlai lian hrangin bel che‘m ni le?
Nge țuan țual vanga tlang dang belh nan,
Chhungkim dar ang len I kham zawk le?
Chu run râm ngei khawhar tur zia chu He hlaphuahtu hian ama nunah senglutin a hawikawm thenrualțhate’n ţuan țul vanga khuai bu khuaiin an rauhsan anga inchanin, tuna a khawharzia tarlan nan hetiang hi a rawn hmawr bawk ta a.
Khuai ram rauh san run aw nang ang hian
Luah loh run min chan ka rual duhte’n
Hlim ten lenlaiin kar lam hla-an
Ţuan zai an rel ta! min dawn lo te’n.
Zirsangzela Hnamte hian Mizo thu leh hla leh rimawi a tihausa-in a tiphuisui sâwt a ni, ka ti lo thei lo.
Aizawl atanga lang reng Chite lui chu hla phuah thiam,Mizo Poet of the Century, Rokunga’n hla-in a han chawi vel ta a,
‘Fiara tui thiang te luang del del,
Lengi nena luia lengngha kan chhai na;
I sirah thing leh maurua an zing riai e,
Luang dem dem rawh piallei a ral hma loh chuan”
a han tih meuh hi chuan,Hnam dang ţawnga “Pa-ni” tih leh “Water” tih ai hi chuan Mizo tawng ngei mai a “ Tui” kan han tih hi chuan a “Tui” hliah hliah bik a, Mizo rilru-ah chuan a lo fiahin a lo chiang ber nge nge a ni, an lo tih thin ang deuhvin , amah Hmangaih Johana’n Juda hnam ngairuatna atanga Van ram a suangtuahna, “nunna tui lui,krustal lung anga tle, Pathian leh Beram No lalthutphaha lo chhuak” a tih ai hian a fimin a thianghlim hmelin zawk daih a, kan ngaih leh thlen hlan kan nghahhlelh em em Van rama lui ni awm hiala mawi leh nuam tura ngaihruat theih tur khawp leh Van ram rim leh angelte rim nam chem chem ta hial emaw tih mai tur khawpa mawiin Mizo tawng pachhe tak hmangin hla a siam thiam bik a ni. He hla sa chunga ngei maia, Rangoon University Mizo lanu valrualte’n Rangoon Radio Station kawt,Medical College No.I tualzawla Chin Day-a kan han lâm ţhin kha chu, zep thu a cheng lo va,kan puanchei leh vakiria hi a lo mawiin a lo langsar (prominent ) em lah tak a, kan Zo hnahthlak dangte lam ai chuan kan sakhmel leh kan sakruang a lo tha-in a lo hleitling bawk nen, hnam dang a entute mit pawh kan titlai nge nge thin zawng a nih kha!
Ti ta daih ila, Vanlalsailova’n ama ir-âwm chhuak ngei,Zoram Ţang Fan Fan,tih hla Lammuala a han thlawh leh zet kha chu Zoram hi a nghinin kan nghing chu a ni ber mai a,hmanna pi pute’n an sawi Buizova kan ngai bil nem le! A sakhmel lamah ni lovin a zaithiam lamah a ni ka tehkhin ni! Modern Buizova ka ti mai! Buizo va iangin sunhlu kungah han zai na se chuan sunhlu hnah chauh a ţil er er mai lo ang a, a sunhlu rah zawng zawng pawh a ţil ur ur ngei ang tih ka ringhlel lo ve! Lengzem hla a sa duh ta lo hi chu Mizo thu leh hla ril lama thahnemngaihna rilru atang chuan ka thil ui berte zinga mi a tling, Pathian hla aiin a thiam zawk si a!
Ka u T.Zorampela’n Daduhi vanglai khan “Daduh, nang erawh zawng piangthar ve lul suh aw, Mizo zaithiam lengzem hla sa tur kan haihchham dah ah nge” a tih lâwm lâwmte pawh kha âwm ve tiu teu deuh chu a ni. Love song hi chuan Art hi a lo fawm famkim deuh! A lehlamah chuan Love song leh rock music hi chuan thalaite thlarau nun hi chu a chawm ve lo chiang leh viau lawi si a,Mizorama concert-a han chhiml ve pawhin thil zahthlak a lo ni ta hial si a, pehţeh dawt nasa leh veng tlabirh leh veng keltila arbawm tawt tak atanga rawnchhuah ni awmte hian concert-ah sorkarna a la ta zel mai bawk si a nih hi! Mihring hi chhang chauhvin a nung lo tih ziak a lo ni leh bawk si!. Rock Music festival hlawtling bera an sawi Woodstock music festivalah khan a chhim tu mipui sahawk nasatzia kha kan la hre hlawm ang a, mahni fate bula sawi zahthak khawp thil kha a thleng tamin a paipawn hnem hle mai si a nih kha! Dr.Ramdinthatra Sailo missionary-a a chhuah tak avanga Mizo Pathian fakna hla phuah lam a pelhe san ta mai erawh hi chu a pamhmai ka ti leh hle bawk a ni.Sakei hrâng chu sakei hrâng dangin an thlak thin an ti a ni lawm ni? Khawiah nge sakei hrâng dang chu? C.Lalzarmawia hi em ni ta ang le?
Mona Lisa hi sum dawng hausa Francesco del Giocondo nupui Lisa del Giocondo lem a ni a, an in thar lawm nan leh an fa pahnihna an neih lawm nan a nupui lem, portrait hi an ziahtir a ni a. Mona tih chu Sap tawnga Ma’am emaw, Madam emaw, My Lady tihna ang a ni a. Mona Lisa tih chu Mizo tawng chuan Ka thai Lisa-i tihna ang vel a ni ang chu. In râm leh chite lui chu hla thu hmanga art work tha tak an rawn siamchhuak ta ang khan Lisa-I rai no ni ngeia lang hmeichhe pakhat hmel atang hian Leonardo Da Vinci chuan a suangtuahna ril leh thuk tak leh a kut themthiamna hmangin khawvel rohlu (master piece)a rawn chherchhuak thei ta a, a ziaktu ngei hi a lemziak Mona Lisa zunah a uai ta tlat mai a, a dam chhung zawng chu he lemziak hi a mutna pindan atanga lak sawn a phal ta reng reng lo zuk nia!
A lem ziahtirtute leh a lem ziaktu te hian 1503 kuma ziak zo tura inbefel an ni na a, a lemziahna rau a lo lang khat ta lutuk si a,France ram lalber King François I khan hi France lal khawnbawl upa,uaiin tha mi leh lal rawsawt ring pha chin ni tura a sawm khan Leonardo chu Italy ram atangin France ramah a pem ta a, heta a lawm lai ,a thih hma kum 3 chhung Mona Lisa lem hi a ziak niin an hria a,titi-ah chuan a lemziak lai hian rimawi tum thiam chungchuang ten rimawiin an awi reng niin an sawi bawk a ni.
A ziaktu thih hnu hian he lemziak ropui hi a awmpui leh amah tanpuitu salia kutah a awm a, France ram Lal berin ecus 4,000 in a leisak a, Fontainebleau-ah dah that a ni ta a. Louis XIV lal a rawn nih han a hnenah he lemziak hi pek a niin, a ni chuan Versailles khua-a lal Inah a dah ta a. French revolution hnu khan he lamziak hi Paris khawpui Louvre Meseum-ah sawn a ni leh ta a. Napoleon I a rawn lal khan a ni chuan Tuileries Lal Ina a mutna pindanah a tar ve thung a. A hnu fe-ah Louvre Mesuem-ah bawk an sawn leh ta a,France leh Prussia indo lai khan he lemziak hi hmun fianrial takah thuhruk a ni a, Indopui II-na lai khan him taka a awm theih nan zawhte no nei an sawi ang maiin hmun hran hranah an dahdawn chhen a, Chateu d Amboise-ah te,Loc-dieu Abbey-ah te leh Montauban khuaa The Ingres Museum-ah te an dahsawn a ni.
1911 kum,Mizoramin mautam tam kan tuar mek lai khan Mona Lisa hi an tarna Louvre Museum atangin a bo daih mai a, France ram thilchhui thiamleh uisa thiam rualin an han chhui pawhin a ngaihna hre lovin an bangbo hle mai a,an beidawn tawh hnu,a khuangcher bo hmiah atanga kum 2 hnuah vanneih thil thuin an hmu chhuak leh ta hlawl mai a! A rutu hian Italy ram khawpui pakhat Florence khuaa Uffizi Gallery director hnena hralh a tum lai takin an va man ta a ni. a rutu hi Louvre Museuma hnathawk Italy mi,Vincenzo Peruggio a lo ni a.Mona Lisa lemziak hi a ngaisangin a ngaihhlut em avang leh a ziaktu Leonardo kha Italy mi a nih bawk avangin he lamziak hi Italy ramah a awm ngei tur a ni tihngaihdan conviction nghet taknei khawpa ramleh hnam hmangaihna neilian mi a nih avanga ruchhuak a lo ni a. A rukchhuah chhan dik tak an han hriat chuan he pa hi Italy ram mipui te chuan an ngaisangin an chawimawi ta zawk a, roreltute pawhin a chungthu an ngaihtuahin thla hnih khat lek a hmingin jail bang an zuttir hnuah an sezawl chhuah tawp mai a ni.
Siamtu Chung Pathian hian Ama anpui ngei-a a siam , a thil siam chu a han en a, ţha a tih em em leh a hmangaih em em mihringte zingah pawh hian , kawchhunga ramhuai 7 aia tlem lo pai rengte hi kan lo awm ve mek bawk ţhin a ni tih kan FB comment suakbak leh tawngkam tlahawlh tak tak kan hman duh dan atang pawh hian a hriat theih reng mai a. “Tin,LALPA thlarau chuan Saula chu a chhuahsan a,LALPA tirh RAMHUAIIN amah a tibuai a”( I Sam 16;14) tih ziak ang khan Pathianin Lal atan a Zawlnei ropui Samuela hmanga hriak a thih ngei Saula meuh pawh a thu a awih loh tak avangin Pathian,Saula hriakthihtirtu ngei pawhin Saula kawchhungah ramhuai a luhtir a nih si chuan keini, Awi! Ka nu,Lucknow!, K’u Sanglianthanga , kohhran Upa,hlaphuah thiam aw tha miah si lo va a hlasak ngaihnawm ve tak leh rimawi tum thiam-in “A dan thu( Pathian thawkkhuma ziak Biabul thu) chu a chhun a zanin a ngaihtuah(meditate) ţhinte chuah hi mi hmuingil an ni, a tih zinga tel lo hi ka va han tam mep mep awm tak em! ....1956 kum khan mi pakhat hian Mona Lisa painting-ah chuan Acid a theh pek a, a lemziak hnuai lam hi acid hian a tihmelhem a.Hemi kum vek December ni 30-ah Bolivia mi,Ugo Ungaza Villegas chuan he lemziak hi lungtumin a vawm chawrh bawk a,Mona Lisa kiu vei lam zawn tak hi a rawng a titla hlawk tawh bawk a ni.
2004 kum khan the National Research council of Canada chuan Mona Lisa painting hi infrared eng zung hmangin an zirching a,Mona Lisa hmaiah hian veil pan leh sin tak a khim a ni tih an finfiah bawk a.National Geographic Society Of America mi thiam rualte nen a siruk lain Mona Lisa changchang zirchianna “Testing the Mona Lisa” an buatsaih ve thung a, an thlalakna tha elkhen infrered reflectography hmanga an zirchian chuan Mona Lisa hi a raino ngei a nih an ring a, a kut zungţang vung deuh anga ziak a nih an ringnghet ta a ni. Chutih mek laiin mithiam scholars thenkhat chuan hmeichhe tituai-nona tihlan nan a kut zuingtang hi a ziak puam/vung deuh mai mai a, rai no tihna lam pawh a kawk hran lo niin an sawi ve thung a ni.
Mona Lisa danglam lehna pakhat chu a mithmul leh mit ko hmul a lo awm lo reng reng mai hi a ni a.chu chuan eng-emaw ti zawng takin Mona Lisa hi a ti-abstract ta a. Mona Lisa smile an tih mawlh mai hi mithiamho inhnialna titamtu chu a ni. Leonardo Da vinci hi lemziak thiam naran a ni mai lova, lemziak mitmeng leh an hmel land an( facial expression) atanga an rilru puthmang( feeling) lantir thiam a ni a. caricature kan tih pawh hi a siamchhuak hmasatu ber a lo ni rengmai.
Mona Lisa nui hmel leh a mitmeng atang hian awmze chi hnih nei thei, a entu rilru put hmang a zira danglam thei nei angtein an sawi ţhin a ni. Thinlung chhung ril taka hlimna thuruk neia nui nge a nih a,rilru hahna riau lungruka vei nei deuh taka,khawvel elsen nana hlim hmel intipu chunga nui nge a nih tih vel hi mithiam-ho chuan zeldin thu bawl nen, mathematics leh science formula hmanga a dikna chawhchhuah fâk theih chi ni si lovin,an calibre leh taste a san leh san loh fiah nan an lo inhnial ve mek bawk a ni.
Mona Lisa,khawvela lemziak lar ber mai hi kum 500 zeta upa a lo ni ta a,mi thiam chi hrang hrangin uluk taka an enkawl leh an tuaihnum leh ţhin avangin a la ţha hle a, tunah tak phei chuan Louvre Museum-a pindan pakhat Sale Des Etats an tih,a dahna tur a bik taka an siam, silai kah tlang theih loh, boruak hnawn lam humidity 50% ni tura siam, boruak lum dan 18-21 degree centigrade ni reng tura siam pindan darthlalanga hung ţhat tlat chhungah an vawng ţha a, thlalakna eng flash hian a rawng a tihdal an hlauh avangin thlalak an phal lo bûr bawk a ni. He lemziak ropui tak mai, SPECIAL em em, en tur hian kum tin khawvel hmun hrang hrang atangin Mizorama mihring awmzat let 6 zet mi nuai 60 zetin France ram Paris khawpui-a awm, The Musee du Louvre hi an tlawh thin a ni.
