Nu HMANGAIHNA

NU HMANGAIHNA: A SHORT STORY - by Familia Fanai Lalţansanga

-----------------------------------1----------------------------------

Ka pa chu zirna ngaisang mi a ni a. A naupan lai chuan lehkha thiam thei tak a ni. An retheih em avanga sikul a kal zawm thei ta lo chu pawi a ti hle a.Pawi a tihzia a sawi fo thin.Ka pa chuan sikul kal thatzia leh lehkha thiam hlutzia hi a sawi ngun hle a.A tĭti tui ber a ni hial awm e. Kan venga naupang lehkha thiam thei deuhte a hmuh remchan apiangin taima taka zir ţang ţang turin a fuih ţhin a. Ka sikul kal ve theih hun hi ka pa chuan nghakhlel takin a thlir thin a ni.

Mahse…….

Ka pa chu a hriselna a ţha vak lo va!

Chuvangin kan rethei ěm ěm a ni.

---------------------------------2 --------------------------------------------

Ka pa unaute’n kan ina unau inhmuhkhawma chawhlui an buatsaih ţum khan khualkhua-a kan chhungte hmel ka hmu ve chauh va. An ţin darh leh hnu chuan kan in chu a reh riai hian ka hria a. Khua a har duh ngei mai.Ni leh thlate an her liam zel a.Khual khua-a chhungkhat lainate hmel kan hmuh lohna pawh a lo rei leh ta vang vang hle a.

Mahse…………

Nikhat chu kan in chhete,daibul hnim ngheng rengah chuan inlěng an ţhahnem viau a. Khualkhua-a kan chhungte hmel pawh ka hmu deuh nual a. Kan inlengte hmel chu a ngui deuh nghűai hian ka hria a.Chu mi nĭ tak chuan ka mi hriat ngai lohte pawh chuan min ngaihsakin min duat bik rĭau hian ka hria a. Mak ti deuh tak chungin ka lo lawm rilru ve viau va.

Mahse……….

Chumi ni tak chu………

Ka pa boral ni tak a lo ni reng mai!

-------------------------------------3-----------------------------------------

Ka nu chu ka pa ruang sirah chuan a ţhu a. Kun tláwk tláwk chungin min pawm a. A bula ţhu ka u,hmeichhe naupang tě ţap kiang kiang chu ka nu chuan lainat takin a han en a. a lungchhe lutuk chu a kun leh ngâwih ngâwih ţhin a. Ka nu mitmeng atang chuan a lungngaihzia leh a lunghchiatzia hai rual a ni lo.

Mahse……..
Ka nu chu a ţap lo! A mittui a tla lo!

Ka nu thlamuan thei rual la ni lo mah ila,ka nu’n mi rinzia leh ka laka a beiseina sanzia chu ka nu ban, mi pawmtu ban,thisen zam leh a marphu ngei atangin ka hria a. Ka nu beiseina leh mi rinziate chu a ţânga bei ve lote chuan min hriatthiampui theiin ka ring lo.

Ka nu chuan ngawi rengin min pawm a.Tumah a be lo.Kam khatte mah a tawng lo.A áwmah nget takin min pawm bet tlat a.Ţap lo tura a insum nan min hmang ta em ni ang le? Ka hrai chawilai hi a thaw a ipik lutuk dah ang e” tih pawh dawn chang lovin min pawm vawng vawng a.

Ka pa ruang chu kuangah an dah a. Ka nu chuan aw nem diai-in “I pa hmel chu a hnuhnung ber atan en rawh u le, Mâmte” min ti a. Ka nu ţawngah chuan ţah áw a tel lo. Ka nu ţawng chu chhete mahin a khur lo. Ka nu chuan min tihlungchhiat a hlau va, ţap lo turin a insűm em ni lě? Ngě, ka pa chuan, “He hring nun khawvel hreawmna te hnuchhawnin Chatuan ram ropui a pán ta “ tiin a inhnem zawk? Kei chuan ka hre lo. Ka hre pha háuh lo…………..ka la naupang em lah tak a!

----------------------------------4----------------------------------------

Ka nu chu a khua a hár thei ěm ěm a. Amah chauh hian a ţhu ngâwi reng thin a.

Tuk khat chu………….zing ni chhuak a ěng mawi hle a. Chu mi nĭ chu ka sikul kal ţan ni tur a ni .

Ka u hmeichhe naupangte chuan min chěi věl a. Ka samte a khuih a, sikul uniform thar min hâktir a. Ka nu chuan ngáwi rengin min lo ěn reng a.Hlim hmel pu tak chungin ngawi rengin min ěn reng a.

Chutah…..a biangah mittui a luang ta !

----------------------------------5-----------------------------------------

Sikul kal tur chuan ka inpeih ât tawh a. Ka nu chu nunhlui ngaihtuah kir leh ni awm tak hian a ēn ngai ěn reng siin, a ngawi reng a.

Chutah……lungchhe vaikai tih hriat faranin, aw rawl chhuah meuhvin a tap chhuak ta phawg a! a tap ri ta râwih râwih a!

---------------------------------6------------------------------------------

Ka pa hnukchah hlim te , ka pa an vui lai te khan ka nu chu tuna a ţah ang hian ţah zawk âwm!

Ka sikul lut ţan tur,ka u hmeichhe naupang fel ve tawh takin min chei vel lai kha,ka pa,ka sikul kal theih hlan nghakhlel taka lo thlirtu ngei mai khan han hmu ve se, a hlim tur-zia leh a lawm tur-zia ngaituahchhuakin ka nu chu, ka pa thih hlimchhawnga a ţah loh ai, tunah lungchhe takin a ţap ta em ni le?

-------------------------------7-----------------------------------------------

Aw……….. Ka nu duh tak;

Ka va lainatin ka va ngaina tak che em!

Ka nu,…. Ka hmangaih a che!